Nesken San Isidro pilota txapelketako sailkapen partidak, gaur goizean frontoian

Leire eta Nagore Galeano ahizpak. /
Leire eta Nagore Galeano ahizpak.

Olatz Insausti eta June Garaikoetxea antzuolarrak finalerako txartel bila irtengo dira

Joseba Lezeta
JOSEBA LEZETA ANTZUOLA.

Neska eta emakumeen San Isidro eskupilota txapelketako bigarren sailkapen jardunaldia jokatuko da gaur goizeko bederatzietatik aurrera Antzuolako frontoian. Bi mailatakok lehiatuko dira. Hamar-dozena bat partida izango dira eguerdira bitartean. Alde batetik, benjaminak alebinekin batera ariko dira; bestetik, nagusiak. Esan behar da nagusi mailako parte-hartzaile guztiak oñatiarrak direla. Gazteenetan, berriz, hainbat herritakoak dira etortzekoak.

Bikote antzuolarra ere bada benjamin-alebin maila horretan. Olatz Insausti eta June Garaikoetxea hilaren 18an, arratsaldeko seietan hasita, San Isidro jaiaren barruan jokatuko diren finaletarako txartel bila irtengo dira. Eskolarteko Gipuzkoako txapelketa irabazi zuen bikote honek otsailean Zaldibian. Aurkariak topatuko dituzte bidean oraingo honetan ere.

Euren mailako finalaren atarian geratu ziren, hain zuzen, Leire eta Nagore Galeano ahizpak aurreko domekan. Partida erabakigarrian hamarna izan ondoren, azken bi tantoak beste aldera erori eta garaipenak ihes egin zien antzuolarrei. Oses-Etxegarai oñatiarrak eta Berrokal-Zubizarreta bergararrak sailkatu ziren finalerako. Oses eta Etxegarai duela gutxi Zumarragan bukatu zen binakako Emakume Master Cup txapelketako irabazleak izan ziren bigarren mailan.

Dokumentalak, eguenean

Artzaintzaren inguruko 'Dominika' eta 'Akabuko martxea' dokumentalak ikusi ahal izango dira Olaran etxean eguen arratsaldeko sei eta erdietan. Ondoren, Aitor Gisasola zuzendariarekin eta antzuolar artzainekin solasaldia egingo da.