Dantzari Eguna maiatzaren 4an ospatuko da bailarako bost taldetako 170 lagunekin

Duela bi urte Dantzari Txiki Eguna egin zen Antzuolan. Aurten helduei dagokie. / ALBERDI
Duela bi urte Dantzari Txiki Eguna egin zen Antzuolan. Aurten helduei dagokie. / ALBERDI

Azken edizioetan bezala, zapatuan egingo da eta Aretxabaletatik, Oñatitik zein Arrasatetik etorriko dira dantzariak

Joseba Lezeta
JOSEBA LEZETA ANTZUOLA.

Oinarin taldeak zehaztuta du maiatzaren 4an, zapatua, ospatuko den bailarako Dantzari Eguneko ia egitarau osoa. Herriz herri txandatuz doa eta Antzuolari dagokio aurtengo ekitaldia antolatzea. Hainbat urtez domekan egin izan bada ere, azken edizioak larunbatean jarri dituzte eta hau ere hala izango da. Ez da umeena, baizik eta helduena.

Oinarinez gain, beste lau dantza talde etorriko dira Antzuolara: Arrasateko bi, Lore Gazteak eta Arroztaitz, Oñatiko Oñatz eta Aretxabaletako Leizarra. Eurekin batera Antzuolako Alborada txistu taldea eta Arrasateko Gaiteroak ariko dira. Guztira 170 lagun espero dituzte.

Goizez hainbat ekitaldi dituzte maiatzaren 4an: 10:00etan, ongi etorria taldeei; 11:00etan, kalejira; eta 11:30ean, Herriko plazako saioa (eguraldi txarra bada, eskolako aterpean).

Hain zuzen ere, arratsaldeko hiruretan eskolako aterpean bertan bilduko dira bazkaltzeko dantzari parte-hartzaile guztiak. Bazkalosterako laga dituzte beste bi saio: 18:00etan, larrain dantza Herriko plazan; eta 18:30ean, poteo kalejira, musikaz lagunduta.