Beñar Kortabarria, 1979tik bi agintaldi beteko dituen aurreneko alkatea

Udalbatzarra berria eta tartean Beñar Kortabarria alkatea zumitza eskuetan duela. /  ALBERDI
Udalbatzarra berria eta tartean Beñar Kortabarria alkatea zumitza eskuetan duela. / ALBERDI

Gehiengo osoa duten EH Bildukoen zazpi boto jaso zituen, EAJko Basili Ormazabalek baino lau gehiago

Joseba Lezeta
JOSEBA LEZETAANTZUOLA.

Beñar Kortabarriak beste lau urtez segiko du alkatetzan, atzo eguerdian osatu zen udalbatza berriak hala erabakita. EH Bildu zerrendaburuak zazpi boto jaso zituen (bere taldeak dituen kideak adina), EAJ-PNVko Basili Ormazabal hautagaiak hiru (alderdiaren zinegotzi kopurua). Lauren aldea, beraz. boto zuri bat ere zenbatu zuten. Ondoriozta daiteke PSEk ez zuela bataren ala bestearen alde egin. Isilpeko bozketa izan zen.

Horrela, diktadura ondoren 1979an hauteskundeak egin zirenetik bi agintaldi beteko dituen lehen alkatea izango da Beñar Kortabarria. Ilaran, gainera. Inma Beristainek, Pedro Iturbek, Jose Angel Zabalok, Mireia Unamunok, Mikel Larreak, Jose Inazio Agirrek, Roque Iñarrak, Iñaki Letek, Jose Mari Ugaldek eta Pako Legorburuk lau urtez gehienez eroan zuten zumi-tza eskuetan.

Alkatea
EH Bildu Beñardo Kortabarria
Zinegotziak
EH Bildu Garazi Larrea
Mikel Bargiela
Josune Martínez
Hodei Aranguren
Yon Aranguren
María Purificación Arregi
PNV Basili Ormazabal
Aitor Mikel Urrutia
Miren Elgarresta
PSE Miren Gallastegui

Horrez gain, egungo hamaika udalkideetatik bostek errepikatzen dute. Alde batetik, hiru zerrendaburuek: Beñar Kortabarria (EH Bildu), Basili Ormazabal (EAJ) eta Miren Gallastegui (PSE). Eta horiekin batera EH Bilduko beste bi lagun: Garazi Larrea eta Mikel Bargiela.

Aukeratu ondorengo hitzaldian, alabari alkatetzara berriz aurkezteko aukeraren berri eman zioneko pasadizoa azaldu zuen Beñar Kortabarriak. «Orain 18 urte ditu eta aurreko hauteskundeetara aurkeztu nintzenean 14 zeuzkan. Hauxe esan zidan nire asmoaren berri eman nionean: 'Lau urte pasatu ditut eta uste duzu orain inporta zaidala?'».

«EH Bilduren proiektua bedeinkatu duten 685 boto-emaileei eskerrak» eman zizkien alkateak. «Baita guri botorik eman ez zigutenei ere. Antzuolar guztien ongizatearen alde egingo dugu lan».

«Arduraz, gardentasunez, konpromisoz eta ilusioz jarraituko dugu lanean», azpimarratu zuen Kortabarriak. «Orain lau urte abiatutako proiektuan sakonduko dugu eta jarraipena emango diogu».

Hitzaldian gogoan izan zituen baita aurreko agintaldian «bidai lagun izan ditudanak, aldekoak zein aurkakoak». Esker hitzak eskaini zizkien haiei ere. Eta aipamen berezia egin zien «itsasontzi honetan segitzen duten Mikel eta Garazi» kideei, EH Bilduko zinegotzi bezala jarraituko duten bi lagunei.

Etxekoez gain, «lagunak eta kuadrilakoak» aipatu zituen baita. «Beti ondoan izan ditut. Eskerrak beti nire alde egin dutelako eta lagun izaten jarraitu dutelako».

«Antzuola hobea egin nahi dugu eta nahi genuke herritarrak udal kontuetan inplikatzea», esan zuen jendaurrean, zinegotziei aurreneko lanak gogoratu aurretik. «San Joan bezperan arbola jaso eta herriko jaietan dantza egitea».

Basili Ormazabal EAJko hautagaiak hartu zuen hitza ondoren. Alkateari «zorionak» eman eta Miren Gallasteguik eta berak ere «itsasontzi barruan» segitzen dutela gogoratu zuen.

Ormazabalen hitzak

Udalaren funtzionamendua hobetzeko zenbait asmo agertu zituen baita, aurreko agintaldiak bere ustez izandako okerrak zuzenduz: «Guk ere parte hartu nahi dugu Udaleko zereginetan eta 2019ko lehen sei hilabeetan batzordeek egin dituzten bilera bakanak baino gehiago deitzea eskatzen dugu, ez zenbait kontu telebista bidez ezagu-tzea».

Puri Arregik eta Garazi Larreak osatu zuten adin mahaia. Irimoegi auzokoak dira biak. Arregi hamaika udalkideetatik urte gehien dituena da eta Larrea, berriz, gazteena. Eurek hartu eta zenbatu zituzten bozak.

EH Bilduko eta EAJko hamar kideek «ez borondatez baizik eta legearen indarrez» egin ziren karguen jabe. Alderdi sozialistako Miren Gallasteguik, ordea, «hitza eman» zuen, besterik gabe.