Artzaintza ezagutzeko bisita Lamariano azpiko baserrira

Joseba Lezeta
JOSEBA LEZETA ANTZUOLA.

San Isidro eguna da gaur, maiatzaren 15a, eta zapatura arte antolatu diren ekitaldiei hasiera emango zaie. Artzaintza ekologikoa garatzen duen Lamariano azpiko baserrira bisita gidatua egingo da gaur arratsaldean. Herriko plazan elkartzekotan dira bisitariak 17:30ean. Autoak hartu eta Lizarraga auzora joango dira.

Doako bisita da eta bertan Txomin Alberdik eta Amaia Laskurainek artaldea nola zaintzen duten eta euren produktuak -esnea, gazta, gatzatua...- nola lantzen dituzten erakutsiko diete bisitariei. Baserria gogoko duten lagunentzat Lamariano Azpikoan gaur egun egiten dena hobeto ezagutzeko aukera aproposa da.

Bihar, dokumentalak

San Isidro asteak, dena den, zapatura arte iraungo du. Bihar arratsaldeko sei eta erdietan, bi dokumental emango dituzte Olaran etxean: zortzi minutu iraungo duen 'Dominika' eta ordubeteko 'Akabuko martxea'. Ondoren solasaldia izango da Aitor Gisasola zuzendariekin. Antzuolar artzainen ere parte hartuko dute.

'Dominika' dokumentalak emakumeek artzaintza munduan duten rola azaltzen du. 'Akabuko martxea' beste era batekoa da. Zegamatik Uribe kostako herrietara egiten den transhumantzia bidea erakusten du, Eli Arrillaga eta Mikel Etxezarreta artzainen eskutik. Aitor Gisasola eta Fredi Paia dira egileak.

Egubakoitza, etzi, festarako gorde dute antolatzaileek. Miren Amuriza eta Beñat Gaztelumendi bertsolariekin kalejira egingo da arratsaldeko zazpi eta erdietatik aurrera. Trikitilariak izango dituzte lagun ibilbidean. Bertsorik ez da faltako.

Zapatuan Debagoieneko artzain eguna eta Atzegi eguna ospatuko dira egitarau zabal batekin. Goizez hasi eta gauera arte luzatuko da.