XVI. Laburbirak kalitatezko 9 film labur dibertigarri dakartza bihar

Zuzendaria. Ane Zuazubiskar 'Erroak' filmaren egilea da eta biharko emanaldiaren ostean solasaldia izango da berarekin. / DV
Zuzendaria. Ane Zuazubiskar 'Erroak' filmaren egilea da eta biharko emanaldiaren ostean solasaldia izango da berarekin. / DV

Sortzaile gazteen lanak gehienak, esperientzia handiko egileenak ere badira ordu beteko emanaldian uztartuta

KEPA OLIDEN ARRASATE.

XVI. Laburbira zirkuitua 9 filmekin dator bihar Arrasatera. Bere ibilbideko 26. emanaldia izango da Kulturateko areto nagusian 19:00etan hasiko dena. Euskarazko film laburren zirkuitua martxoaren 20an Bergaran hasi zen eta apirilaren 13an amaituko da Valentzian, 35 herri bisitatu ondoren.

Aurtengo 9 film laburrak, guztiak 2016 eta 2018a bitartean egindakoak, sortzaile gazteen lanak dira gehienak. Esperientzia handia duten sortzaileenak ere badira. Bederatzitik zazpi emakumeek zuzendutakoak. Ordubeteko proiekzioan uztartuta, kalitatezkoa eta dibertigarria den emanaldia osotzen dute. Maitasun istorioak, tentsio bizikoak, bi animaziozko lan, iraganeko kontakizunen bat, Behe Nafarroko istorio bat, majia, intriga eta umorea dira, besteak beste, aurtengoek dakartena.

'Begi ninien koreografia' bideo Art musikatu ba da, maitasun istorio bizi bat kontatzen da. Irudiak Urdaibai ingurukoak dira, oso ikusgarriak eta musikak lagunduta, oso gustura ikusten den filma da. Arrate Fernandez Itsaso da zuzendaria.

'Shell phone' gaur egungo zaharren, zaintzaren eta teknologia berrien arteko lotura egiten duen filma da. Emakume nagusi bati semeak pisu eroso eta moderno bat ipini dio, teknologia berriek amaren beharrei erantzungo dielakoan. Baina justu berak nahi duenaren kontrakoa gertatuko da... Miren Mujika da zuzendaria.

'Zapatak' animazio film labur bat da. Egileak hiru minututan irudikatzen du bere amonak gaztetan bizitako gertaera bat. Bizia eta koloretsua da. Zuzendaria: Irati Murua.

'Ama' 1915ean, Behe Nafarroako Baigorri herriko auzo urrun batean dago kokatuta istorioa. Ama batek gutun baten esperoan bizi duena kontatzen du. Irudi aldetik ikusgarria, paisaia ederrak agertzen dira. Josu Martinez da zuzendaria.

'June'k osaba-izebekin baserrian bizi den 10 urteko neskatila baten istorioa kontatzen du; amaieran ezagutuko dugu zer sekretu gordetzen duen Junek. Zuzendaria Arantza Ibarra da.

'Hotzean garbitu' umorezkoa da. Kontatzen du nola bi ezezagun elkartzen diren garbitegi batean eta barne pentsamenduetan ibiltzetik nola hasten diren elkarrekin hitz egiten, elkar erakartzen. Maddi Barrenetxea eta Marta Teijeira dira zuzendariak.

'Ilunpean' Kameratoia rallyko film irabazlea da. Itsuen errealitatea begiekin antzeman daitekeena bezain erreala dela erakusten du, beste zentzumenek sentiarazten dizkiguten sentsazioak sentiaraziz. Iker Maguregi eta Andrea Martinez dira zuzendariak.

'Handiak eta txikiak' animazio lana hau ere, Laida Ruiz Juarros gaztearena da. Erakusten digu zelan neguko gau hotz batean istorioko protagonista murgiltzen den mundu zoragarri batean; bertan dauden arriskuez konturatu gabe.

Ane Zuazubikar

'Erroak' filmaren protagonista hogeita hamar urteko emakume bat da. Ingurukoak zenbait erabaki hartzen ari direla ikusten du, eta horrek sentiarazten dio berak ere erabakiak hartu beharrean dagoela. Eta geroz eta denbora gutxiago duela. Presioa sentitzen du. Ane Zuazubiskar arrasatearra da zuzendaria. Ane biharko emanaldian egongo da eta ondoren solasaldia izango da berarekin.

Ane Zuazubiskar (Arrasate, 1997) Ikus-entzunezko Komunikazioko graduko ikaslea da; zuzendari moduan lehen film laburra du 'Erroak'.

Aurretik, beste lan batzuetan lan egin izan du taldean: '280º', 'Jorrai' eta 'Lege Zahar' film laburren egileetako bat da. 'Erroak' film laburra 2018ko Lekeitioko Euskal Zine Bileran aurkeztu zuten, eta Euskarazko Film laburrik onenaren saria eskuratu zuen Errenteria Film Festivalen.