Arrasateko Udalak informazio turistikoa erantsi dio bere webguneari

Udalak bi irteera antolatu ditu astebururako, horietako bat Arrasate historikoan zehar /DV
Udalak bi irteera antolatu ditu astebururako, horietako bat Arrasate historikoan zehar / DV

Asteburu honetarako bi bisita antolatu ditu, bata gune gotortuei buruzkoa, bestea lehengo meatzarien ingurukoa

El Diario Vasco
EL DIARIO VASCODonostia

Arrasateko Udalak bere herri barruko turismo eskaintzari buruzko atala sortu du bere webgunean. 'Mondragontourism' jarri zaio izena, eta Informazio osoa http://turismo.arrasate.eus helbidean aurki daiteke. Asteburu honetarako bi irteerari buruzko informazioa eskaintzen da bertan, adibidez.

Helburua da udalerriko turismo informazioa bisitariaren eskura jartzea. Informazio praktikoa topatu daiteke: zer egin, bisita gidatuak, natura bideak, ostatuak, agenda…

Hona hemen bertako gai nagusiak: Arrasateko natura bideak eta ekintza gidatuak. Natura bideetan, esaterako, Arrasateko mendi eta auzo ibilbideak, eta bide bakoitzaren informazio praktikoa aurki daiteke: mapak, informazio teknikoa, leku interesgarriak eta abar.

Udalak bi irteera antolatu ditu asteburu honi begira. Ekintza gidatuetan, berriz, 2019rako programazioa egin da, bisita gidatuak Arrasateko alde zaharrean eta irteera gidatuak natura ingurunean.

Orain argitaratu da apiriletik uztailerako egitaraua, eta udan aterako da uztailetik abendura artekoa.

Zapatu honetan, hilak 20, bisita gidatua egingo da Arrasate historikoan zehar, batez ere esparru gotortuei eta babeserako eraikinei erreparatuz.

Hamabost leku daude libre. Izena eman behar da, eta irteera goizeko 11etan hasiko da, herriko plazan. Informazio gehiago, eta gidarekin kontaktatzeko: info@feeleuskadi.eu - 644 37 47 46.

Beste irteera igandean izango da, hilak 21, goizeko 9etan hasita Monterronen. Burdinari buruzkoa izango da, izena eman behar da eta hogei leku daude libre eta informazio gehiagorako hau da helbidea: info@menditxik.com - 616 85 81 26.

Bigarren ibilbide honek, burdinak zer bide egiten zuen antzina erakusten du: minerala non garbitzen zen, eta Meatzerreka auzoa bera, meatzarien auzoa. Halaber, bidean ikusiko dira Itturritxipiko gaina, eta Epeleko gaina eta gerra zibileko lubakiak.

Temas

Euskera