Udaleko Kultura sailak abian jarri duen Sorlekutik egitasmoaren barne, gaur arratsaldean, 19:00etan Sanz Eneako sotoan, hirugarren solasaldia, gaurkoan Miren Fernandez eta Antxon Sarasuarekin. Batak eta besteak zein proiektutan dabiltzan azalduko digute.
Aurreko bi saioetan Mikel Cazalis musikariak eta 'Txiliku' idazleak hartu dute parte. Herritar askorik ez da inguratu saioetara. Ohiturarik oraindik ez dugula hartu dirudi, baina proposamen interesgarria da artista bakoitzak bere proiektuen berri ematearena.
Gaurkoan Miren Fernandez eta Antxon Sarasua haurrentzako kantuak bilduta osatu duten diskoaren inguruan mintzatuko dira, 'Lo lo maite', Elkar argitaletxeak kaleratu duena. Sarasuak hainbat abesti sortu eta beste zenbait moldatu ditu eta pianoa ere jo du. Miren Fernandezek, berriz, abestu egin ditu. Hamaika abestietatik herri kantuak dira gehienak, ezagunak, baina badira abesti berriak ere. «Batzuk ez dira berez lo kantuak, baina bai tonu lasaigarria dutenak», diote. «Alde batetik, transmisioa bildu dugu, eta, bestetik, ekarpena». Haurrengan pentsatuz eta gurasoak erakartzeko asmoz landu dute proiektua. Azken diskoetaz eta buru artean dituzten beste proiektuetaz hitzegingo dute gaur.
