Euskal Herriko pailazorik entzutetsuenak Lazkaon ere izango ditugu laster. Lazkaoko Gazte Asanbladak eta Ansoategi elkarteak antolaturik, datorren hilaren 25ean, larunbatarekin, Areria kulturguneko eszenatokian izango ditugu Pirritx, Porrotx eta Marimotots. Ez dira bakarrik etorriko, gainera, beraiekin izango baita Bonberenea txaranga. Arratsaldeko 16:30ean plazatik abiatuta, Areria kulturgunera bidean herria girotuko dute guztiak lekarrekin. Ondoren, bi emanaldi eskainiko dituzte. Lehenengoa 17:00etan hasita eta bestea 18:30ean. Sarrerak Gerriko liburu dendan daude salgai 5 euroko prezioan.
Pasa den azaroan aurkeztu zuten Bonberenea txarangak eta Pirritx, Porrotx eta Marimototx pailazoek elkarlanean burutu duten diskoa, txarangaren hirugarrena. «Tolosako gaztetxeak eta Euskal Herriko pailazorik ospetsuenek 2002an hasitako bideak era natural batean eskatu du horrelako proiektu bati aurre egitea, eta disko honek ibilbide hori islatzen du», azaldu zuten aurkezpenean. Lan honetan, Pirritx, Porrotx eta Marimotots pailazoen kanturik ezagunenak «Bonberenea erara» izan dira prestatuak, txarangaren hotsa pailazoen ahots eta letrekin nahastuz. Diskoarekin batera, elementu desberdinez osaturiko DVDa ere badago.
