Ezin hobeto ekin dio Aralar-Intxurreko infantil nesken taldeak Kopako txapelketari: lehenengo jardunaldian 3-7 irabazi zioten Sto. Tomas Lizeoa ikastolako taldeari, eta markagailu horri esker, multzoko lidergoa eskuratu du Imanol Irazustabarrena eta Beñat Hierroren taldeak. Aralar-Intxurreko infantil mutilek ere emaitza bikaina lortu dute Ligako azken jardunaldian: 2-7 irabazi zioten Danenari, eta garaipen horri esker Tolosari aurrea hartu eta sailkapeneko hirugarren postura igo dira.
Kadeteen taldea izan da pasa den jardunaldian hiru puntuak poltsikoratu dituen hirugarren taldea. Eneko Garmendiaren mutilak 1-6 nagusitu ziren Aizkorri Goierriren aurrean, eta bigarren dira 12 punturekin, lidertzan den Euskalduna Brekin puntutara berdinduta.
Txanponaren beste aldean jubenilak, kadete neskak eta preferentean diharduen Intxurreko taldea punturik gabe geratu dira. Azken hauekin hasiz, Santos Irazustabarrenaren mutilek 7-1 galdu zuten Ilintxaren aurka, eta ondorioz, sailkapeneko azken postutik ihes egin ezinik jarraitzen dute. Jubenilek 2-1 galdu zuten Segura Goierriren aurka, baina esku hutsik geratu arren bigarren postuan dira 9 punturekin, liderrarengandik puntu bakarrera. Azkenik, kadeteen mailako neskek 1-5 galdu zuten Añorgaren aurka, eta Txapeldunen Fasean multzoko sailkapeneko seigarren postuan daude, bosgarrenean den Mondragonekin puntutara berdinduta.
Datorren asteburuan ez da futbol jardunaldirik izango, eta hurrengo partidak otsailaren 25ean eta 26an jokatuko dira.
