Gipuzkoako Taldekako Xake Ligan diharduten getariar taldeek, bigarren eta hirugarren mailakoak, etxean hartuko dituzte gaur aurkariak Ligako 5. jardunaldian, arratsaldeko 16:00etatik aurrera jokatuko direlarik partida guztiak Udal Liburutegian.
Bigarren mailan diharduen Keta xake taldeak Billabona C taldearen aurka arituko da gaur, iragan astean Hernanin Hernani B taldearen aurka 2,5 - 1,5 galdu ostean. Getariarrak ondo kokatuta ditugu multzoko sailkapenean, 2. postuan 9 punturekin (liderra, Hernani B, soilik bi puntu t'erdira dutelarik, 11,5ekin). Billabonakoak, aldiz, sailkapenaren 7. postuan dira (azken aurrekoak), 6,5 punturekin.
Hirugarren mailan diharduten Keta B xake taldeko gaztetxoak, berriz, Zarauzko D taldearen aurka lehiatuko dira gaur, iragan astean Donostian Gros H taldearen aurka 2,5 - 1,5 galdu ostean. Keta B xake taldeko gaztetxoak azkenak ditugu multzoko sailkapenean, lehen urtea dutelarik hau Lurraldeko Taldekako Ligan, gaur etxean jokatuz, etxekoen babes eta berotasunarekin, 16:00etatik aurrera.
