Larunbatean hasi zen Girizia elkarteak Josetxo Gamioren oroimenez antolatzen duen Euskal Herriko pala txapelketa irekia. Aurtengo edizioan guztira 71 bikote apuntatu dira, gizonezko mailan 63 bikote eta beste 8 bikote emakumezko mailan. Aste buruan bederatzi partidu jokatu ziren eta denetarik ikusi genuen, partidu orekatuak eta tentsio handikoak batzuk eta beste batzuk berriz, nahiko desorekatuak.
Lehengo mailari dagokionean, Peluaga eta Huegun donostiarrek partidu txukun bat jokatu ondoren, nahiko erraz, 25 eta 15 menperatu zituzten Izagirre eta Nazabal tolosarrak. Bestalde, Otegi eta Antxordokik oso erraz, 25 eta 10, menperatu zituzten Ubeda eta Azpeitiak osatzen duten bikotea.
Bigarren mailan berriz lau partidu jokatu ziren eta orekatasunari dagokionez, aipatzekoena, Barbulo eta Aranjuelo bikoteak eta Rey eta Zapirainek jokatutakoa izan zen. Lehenengo bikoteak, 25 eta 24ko emaitzarekin, irabazi zuen azkenean tentsio handiko partidu batean. Hirugarren mailan ere denetik izan zen. Ikusteko politena Olaizola eta Muruak 25 eta 23 Zubeldia eta Santamariari irabazi ziotena. Kontuak kontu, pilotazaleek gozatzeko aukera izan zuten Madalensoro pilotalekuan partidu sortarekin. Txapelketa bihar bertan itzuliko da herriko frontoira. Goizeko 10.00etatik aurrera hiru partidu jokatuko dira, arratsalderako (15.00etatik aurrera) beste bi geratuko direlarik. Jardunaldia igandean bukatuko da goizeko 9.00etatik aurrera lehiatuko diren azken lau partiduekin.
