Bikain aritu dira Zegama, Segura, Zerain eta Mutiloako Tobera Musika- eskolako ikasleak otsailaren 4ko eta 5eko asteburuan egin den Andoaingo 7. Piano-jaialdian. Iaz bezala, eskolako ikasle gaztetxoenen aldeko apustua egin du aurten ere Toberak. Andoainen bakarlarien kategorian aritutako 4 ikasleek epaimahaiaren balorazio ona jaso dute: Andrei Joan Filip ikasle zegamar hasiberriak, Izaskun Malkorra herrikideak eta Ander Svensson segurarrak zilarrezko domina eta aipamena eskuratu zuten. Eta Kepa Garmendia mutiloarra, berriz, epaileen kalifikazio gorena eskuetan etxeratu zen, urrezko dominarekin hain zuzen ere. Segurar eta mutiloarrak otsailaren 22rako eskolak prestatu duen inauterietako kontzertu eta erakustaldian hartuko dute parte, jaialdiko pieza berekin. Kontzertu hau Botikaxahar Kulturgunean izango da arratsaldeko 6:30ean. Eta zegamarrek, aldiz, martxoaren 28an Aitxuriko ikus-entzunezkoen gelan egingo den entzunaldian erakutsiko dute herritarren aurrean egindako lana.
IdiazAbalgo txistu alardean
Horrez gain, Laida Arrondo eta Itxaso Berasategi txistu-ikasle zegamarrak urtarrilaren 28ko Idiazabalgo Txistulari-alardean parte hartutako kiderik gazteenak izan ziren. Berretsi egiten da, horrela, Tobera Musika-eskolak gaztetxoenen alde egina duen apustu tinkoa.
Zorionak beren irakasle Ainhoa eta Rosa Mariri ere.
