Getariako udal langileek jakinarazi dute bat egin dutela gaurko deitu den 4 orduko geldialdi deialdiaren xedearekin, baina protesta egiteko modu ezberdin baten bidez: lanera joango dira eta geldialdi garaiko lanorduen diru-kopurua Getariako behar sozialak dituzten herritarren artean banatu dadin emango dute.
Zerbitzu publikoek eta bertako langileek jasaten ari diren murrizketen aurrean gaurko lan uzte deialdiaren aurrean Getariako udal langileek asanblada egin zuten pasa den ostiralean. Honetan, langileek euren gogaitasuna azaldu zuten krisia beti berdinen lepora konpondu behar izanagatik eta agintariek protesta hauengandik irabaziak ateratzen dituztelako.
Gauzak honela, ondokoa erabaki dute: protesta modura, gaur, geldialdi egunean, lanera joango dira modu arruntean eta ondoren, greba eginez gero enpresak aurreztuko zuen dirua (euren soldatetatik sortuko litzatekeena) gizarte behar larriak duten getariar herritarren- tzat emango dute.
Eskolan bai lan uztea gaur
Iturzaeta Herri Eskolako irakasleek, berriz, bai egingo dute lan uztea gaur, 11:00etatik aurrera, gutxieneko 'zaintza' zerbitzu minimoa soilik izango delarik, eta hala eskatu duten erabiltzaileentzat jangela eta autobus zerbitzua.
