Larunbat arratsaldean Mungiako zelai eraberrituan neurtu zituzten indarrak multzoko 3. eta 4. sailkatuek. Zarauztarren aurkaria, Uribealdea zen, duela urte batzuk Mungia eta Kakarraldo klubak elkartuz sortu zuten taldea. Lehengo urtean Ohorezko B mailan aritu ziren eta zinez talde sendoa osatzen dute.
Jokoan oso sartuta ekin zioten partiduari zarauztarrek eta lehenengo zatian jaun eta jabe izan ziren. Defentsan egoki aritu ziren eta erasoan, berriz, min egiten zuten baloia atzean jokatzen zuten bakoitzean. Baloia aurkarien zelai erdian jartzen asmatu zuten eta gero ongi presionatu zuten. Lan on horren ondorioz, aukera gehiago izan bazituzten ere, entsegu bat eta zigor kolpe bat lortu zituzten atsedenaldirako 0-8 aurreratuaz.
Bigarren zatia gogorragoa izan zen. Uribealdeak aldaketa asko egin zituen taldeari freskotasuna emanez eta zarauztarrek gogotik egin izan zuten lan bizkaitarren erasoaldiak geratzeko. Hala ere, zarauztarrak izan ziren bigarren zatian puntuak lortzen lehenak, aurkarien zigor kolpe inozo batetaz baliatuz (0 -11). Baina Uribealdea ofizio handiko jokalariez osatua dago eta aurrelarien bitartez entsegu bat lortu zuten markagailuan 7-11 emai-tza estua ezarriaz.
Partidua amaitzear zegoela, kontraeraso baten ondoren partidua erabakita utziko lukeen entsegu bat lortu zuten zarauztarrek, baina epaileak, erabaki ulertezin batekin, jokaldia baliogabetu egin zuen. Uribealdekoek, beraien azken aukera zela jakinik, erasora jo zuten baina berriz ere zarauztarren defentsa sendoarekin egin zuten topo eta ezin izan zuten markagailua irauli.
Garaipen honek emandako puntuekin, zarauztarrak ligako 3. postuan jarri dira bi jardunaldi bakarrik falta direnean. Azken bi partiduak sailkapeneko lehenaren eta bigarrenaren aurka jokatu behar dituztenez, igoera faserako txartela eskaintzen duten lehen bi postuetan amaitzeko borrokatuko dira zarauztarrak.
Infantil federatuak
Lehen itzuliko azken partidua jokatu zuten larunbat goizean ZRT-ko infantil federatuek. Eguraldiaren iragarpenek agindu bezala hotz egin zuen Astin eta zelaia zati ba-tzuetan gogorra egon arren, partidua jokatzeko moduan izan ziren.
Lehen zatian, atsedenaldian galtzen joan arren, donostiarrei aurre egiteko gai zirela erakutsi zuten zarauztarrek.
Bigarren zatia gogotsu hasi zuten zarauztarrek eta markagailua parekatzeko entsegua lortu zezaketela zirudienean, baloia galdu eta donostiarrak izan ziren entsegua lortu zutenak. Zorigaiztoko jokaldi honek partidua apurtu zuen eta amaierako emaitza nabarmena izan zen donostiarren alde.
Hemendik bi astetara ligako bigarren itzulia hasiko dute. Denboraldian zehar erakutsitako hobekuntza dela eta, itxaropentsu ekingo diote garai berri honi.
Infantil mailako 3 jokalarik Euskadiko Selekzioak egin behar dituen entrenamenduetan parte hartuko dute: Unai Elustondo, Patxi Gabilondo eta Ibai Mitxelena lasartearrak. Lan bikaina egin dute denak eta hau dute saria.
