Debabarreneko udalek eta Debegesa garraio publikoen erabilera sustatzeko asmoarekin hirietako markesinetan autobus eta tren-linea guztien gaineko informazio gaurkotua jarri dute formatu bakarrean. Horrela, Itziarko eta Deba erdiguneko markesinetan mapa hau ipini da Debabarreneko Mugikortasun Mahaiaren proposamenez eta Eusko Jaurlaritzako Ingurumen Sailaren laguntzarekin eta Gipuzkoako Garraioaren Lurralde Agintaritzak editatu du.
Ideia hau aurrera eraman nahi izan dute garraio publikoen erabilera sustatu nahian eta gutxiago kutsatzen duen mugikortasunaren aldeko apostua eginez. Debaz aparte, Eibar, Soraluze, Elgoibar, Mendaro eta Mutrikun gauza bera burutu da.
Debegesak bere web orrialdean (debegesa.com) igo du mapa hau eta nahi duenak inprimatu dezake. Bertan erraz ikusten dira tren eta autobus publikoen ordutegiak, ibilbideak eta maiztasuna. Era berean, Debako bizilagunak udaletxean eskuratu dezakete mapa hau.
Azterketa
Debabarreneko autobus markesinen egoeraren azterketa egin da, garraio publikoari buruzko informazioaren ikuspegitik. Orain, autobus-linea ezberdinen ordutegi, maiztasun eta ibilbideen gaineko informazio eguneratua ipintzeari ekin dio Debegesak.
