Asteburu honetan ere tailer didaktiko batean parte hartzeko aukera eskaintzen du Ezkio-Itsasoko Igartubeiti Baserri Museoak, oraingoan 'Herri kirolak' izenburua izango duelarik. Ez da lehenengo aldia herri kirolen inguruko tailerra aurrera eramaten dela museoan eta aurrekoetan ederki pasatu dute gaztetxoek. Honetan, partaideek herri kirolen eta baserriko lanen arteko harremana ezagutzeko aukera dute. Larunbateko tailerrean parte hartzen duten haurrek baserriko nagusiari lanak egiten lagunduko diote: esnea ekarri, artoa errotara eraman, aletutako artaburuak bildu, gurdiari buelta eman eta abar.
Honetan parte hartzeko, eta astero bezala, aurretik izena ematea komeni da, eta era desberdinak daude hau egiteko: 943 72 29 78 telefono zenbakira deitu, www.igartubeitibaserria.net orrian sartu edo igartubeiti@gipuzkoa.net korreo elektronikora idatzi.
