Kaleak itsaso bilakatuko dira hemendik hamar egunetara, Gazte Asanbladak antolatutako inauterien barruan. Uholdea otsailaren 18an helduko da herrira, poteo, bazkari eta kalejira haundiarekin. Antolatzaileak asteak daramatzate karroza prestatzen eta bazkarirako txartelak ere salgai jarri dituzte Gaztetxean, Karibe Zaharra eta Kukue tabernetan. Edozeinek eskuratu ditzazke datorren igandera arte, 15 euroren truke.
Hona hemen egun horretarako prestatu duten egitaraua: 12:30etan eta morala falta ez zaigunez beste poteo saiakera bat egingo dugu, aurten ere ezetz!, 14:30etan bazkari herrikoia Aitxuri jatetxean, 17:00etan Gazte Asanbladaren baporeko eskifaia martxan jarriko da Hegialden kalejirari hasiera emanez, Gaztetxeko portuan geldialdia egin eta ondoren Kale Nagusiko itsasoa zeharkatuko dugu, azkenik gure baporeak aingura Nafarroa Kalean botako du, 24:00etan eguna agurtzeko Euskal Herria enparantzan bilduko gara baporearen inguruan azken ke-aldia egiteko.
Legazpiko gazte, txiki eta helduak aurtengo inauterietako ur gazietan murgiltzera gonbidatzen dituzte, ganoraz igeri egiteko mozorroa soinean jantzita. Itsasoaren tematikak aukera zabala eskaintzen du pertsonaia aukeratzerako orduan.
