Hotz galanta eta elurrari aurre eginez, pasa den larunbatean egin zen Santa Eskea, hainbat urtetako tradizioari jarraipena emanez. Aurten gainera, Santa Ageda egunaren bezpera zen eta tradizioa bete betean gauzatu zuten, Santa Ageda egunaren aurreko egunean irtetzea agintzen bait du honek. Goizean goiz hasi ziren koplari eta beraien laguntzaileak herria alaitzen. 50 lagun inguru batu ziren udaletxe aurrean goizeko 8:30etan eta erropaz eta umore onez ongi horniturik, hiru taldetan banatu ziren. Talde bakoitzak herriko ingurune bat pasa zuen eta eguerdi alderako iritsi ziren Mendaroko kaleetara. Egunean zehar bertso politak entzute aukera izan zen eta gazte jendearen parte hartze handia ere aipatzekoa izan zen.
Arratsaldeko 3ak aldean bukatu zuten lanarekin eta ondoren denak Aizpe gastronomi elkartean batu ziren bazkari goxo bat dastatuz, diru kontaketak egiteko. Aurtengo edizioan 3.500 euro batu ziren, aurreko urtean baino 600 euro gehiago eta gastuak ordaindu ostean, 2.000 euro geratu ziren Aingeru Guardako ermitaren aurrean ipini berria den farola ordaintzeko.
