Atzo larunbata eta herenegun Santa Agedako ohitura zaharrak presentzi nabarmena izan zuen Zestoan; Ostiralean, Santa Agedako irudi zaharrez osatutako DVDaren aurkezpena eta Luis Mendizabal 'Gexala'ri egin zitzaion omenaldi xume baina hunkigarria adibide.
Gexalak makila, eskerako erabiltzen den poltsa eta zapia jaso zituen opari Santa Agedako taldekideen eskutik azken urteetan poltsero egin duen etengabeko lan itzelagatik.
Odol Emaileen taldekoek ere parte hartu nahi izan zuten omenaldian eta koadro bat oparitu zioten urte askoan beraien taldearentzat egin izan baita diru bilketa.
Atzo berriz, Santa Ageda Bezpera, aspaldiko urteetan egin ohi den bezala urteroko Santa Agedako kideak hor ibili ziren baserriz baserri, bailaraz bailara, kalerik kale eta tabernaz taberna koplak abestu eta bazterrak alaitzen.
Horrez gain, ezin ahaztu gauean Gure Txokoa elkartean izan zen liburu aurkezpena eta bertso afaria (Egaña eta Lujanbio bertsolariekin), baina horretaz hurrengoan arituko gara zabalago.
