Goizeko 8:30etan bildu ziren herriko 25 bat lagun Mikel Elkartean gorputza ondo berotu eta asetzeko egunari aurre egiteko asmoz. Bederatziak pasatxo zirenean atera ziren auzo eta baserrietarantz Santa Ageda bezperako koplak abestera.
Elur malutak ere lagun izan zituzten egun osoan zehar, elurrak bazterrak zuritzen ez zituen arren; Saiatz, Erreka, Etxabe, Zubialde eta Muitzagain pasa ondoren herrira itzuli ziren, eguna afari eder batekin amaitu zutelarik. Hainbat urtetan bezalaxe, koplari nagusi lanetan Aitor Mendiluze aritu zen, Adiskide bertso eskolako kideek lagunduta.
Bildu zen dirua bertso eskolako urteko beharrei aurre egiteko izan zen.
Zabor arazoak
Azken denboraldian herriko zaborontzi inguruetan zabor poltsa ugari pilatuta egoten da lurrean; udalak gogorarazi nahi du jasoketa egunak aastelehen, asteazken eta larunbatak direla eta zaborra ateratzeko garaian lurrean ez uzteko.
