Santa Ageda Eguna gaur da, baina atzo eta ostiral arratsaldean ospatu zen giro onean. Talde ezberdinak atera ziren eta hotzari aurre egin behar izan zioten eta batzuk baita elurrari ere. Hala ere, abestutako koplek lortu zuten bizilagunak berotzea eta jendea animatzea. Santa Ageda Egunaren bezpera herri guztira heldu zen.
Itziarko Kultur Elkarteko kideek buruan zeukaten baserri eta etxe guztietako ateak jotzea eta horrela egin zuten atzo. Herritar ugari animatu ziren baserritar jantziak ipintzera, makilak hartuta, eta Santa Agedako koplak abestera. Lehenbizi, guztiak bildu ziren plazan eta han taldeetan banatu ziren. Handik bakoitzak bere bidea hartu zuen eta abiatu ziren umore ona zabaltzera. Leku askotara iritsi ziren kantak. Hotz asko egin arren koplen erritmoa ez zen gelditu. Baserri eta etxe guztietara ailegatu ziren. Aurten, Itziar eskolako ikasle eta gurasoek Santa Agedako ekitaldietan parte hartzea aukeratu zuten. Horrela, hauek gehitu ziren festara. Itziar eta inguruetatik Santa Agedako soinuak zabaldu ziren. Ekitaldi polita izan zen atzokoa. Bizilagunek bertsolari eta trikitilarien laguntza izan zuten.
Gazteak erdigunetik
Musika Eskolako ikasleek ostiral arratsaldean eduki zuten euren momentua. Koral klaseko 42 gazte lau abesti eskeini zuten herriko erdigunetik egindako kalejiran. Akordeoi eta txistuek soinuak jarri zituzten. Denak batera giroa alaitu zuten. Musika eskolako ikasleek atera baino lehen, Luzaro ikastoletako gazteen txanda izan zen. Euren gelak hutzi eta kalejira bat burutu zuten udaletxeko plazaraino. Guraso eta lagun ugarik jarraitu zuten txikiek egindako ekintza.
