Zestoako talde nagusiak azken jardunaldia Soraluzen galdu ostean, ia ezinbestekoa izango du gaur arratsaldean Ilintxa-ren aurka jokatu behar duen partida irabaztea: Horrela, beheko postuetatik aldendu (egun 5 puntutara daude) eta berriro gorantz begira jartzeko balio izango dio. Ez da hau lan erraza izango, Ilintxa zortzigarren postuan baitago eta Zestoa bi postu beherago, eta ondorioz berdintasuna nabarmena da bi talde hauen artean.
Baina Zestoako talde nagusiak galdu egin bazuen ere, beste taldeen partidetatik albiste hobeagoak izan genituen, izan ere infantilak (11-1), kadete mutilak (5-0), jubenilak (0-2) eta kadete neskak (0-6) irabazi egin zuten. Kastillak etxean beste berdinketa berri bat (0-0) lortu zuen.
Gauzak horrela gaur honako partidak jokatuko dira Iraetako zelaian: eguerdiko 12:00etan, infantilak Usurbil-en aurka arituko dira; 15:30ean, Talde nagusia eta Ilintxa-ren arteko norgehiagoka izango da; segidan, arratsaldeko 17:30ean hasita, kadete neskak Azkoitiko Anaitasuna taldearen aurka jokatuko dute.
Atletismo txapelketarik ez
Datozen orduetako eguraldiaren iragarpena dela eta Gipuzkoako Foru Aldundiaren gomendioa kontutan hartuz, Zestoako Atletismo Taldeak, bihar ospatu behar zen eskolarteko atletismo probak atzeratzea erabaki du. Txapelketa hau ospatuko den data berria oraindik erabakitzeko dago. Dena den otsailean bertan edo martxoan ospatzea espero da.
