Asteburu paregabea burutu dute Oiarpeko pilotariek partida guztiak irabaziz. Euskal Herriko Txapelketan esaterako, jubenil mailako banako partidan, Andoni Ugaldek 22-19 irabazi zuen eta binaka Oier Sarasti eta Ander Imazek 22-6 irabazi zuten, bi kasuetan Hoberena taldea zelarik aurkaria. Txapelketa honetako hirugarren norgehiagokan, berriz, Iñigo Ugaldek 22-19 irabazi zion Lanari 22 urtez azpiko mailan. Udaberri Txapelketan ere senior mailan Mikel Martínez eta Jon Irastorzak osatzen duten bikoteak 22-11 irabazi zion Antiguokori.
Azkenik, Gipuzkoako Txapelketan jokatutako bi partidak ere garaipenarekin bukatu ziren Oiarperentzat. Infantil mailan eta binaka izan ziren bi partidak eta biak ere 22-11 emaitzarekin bukatu ziren. Oiartzuarren aldetik Aitor Leonet-Ekain Etxeberria eta Imanol Ugalde-Aritz Leonet bikoteak izan ziren garaileak.
