Matxinbentako festa batzordeak antolatuta, larunbatean goizean Ezkio-Itsasoko Matxinbenta auzoko Santa Ageda jaiei hasiera emango diete auzotarrek, asteburuan zehar ekintza desberdinak aurrera eramango dituztelarik, eta igandea egun potoloa izanik. Beraz, larunbatean goizean eskean irtengo dira auzotarrak; eta iluntzean berriz, auzo afaria, eskekoen etorrera eta erromeria Lidia Irigoyen eta Xabier Etxanizekin ospatuko dute.
Igandea
Esan bezala igandea izango dugu egun potoloa, hasteko goizean Goiz Eresia, Azpeitiko txistulariak en-tzuteko aukera izango dugularik.
Ondoren, goizeko 11:00etan meza nagusia ospatuko da auzoko elizan eta hau amaitu bezain laster ume jolasak, eta pilota partidei ekingo diete auzotarrek. Hau guztia aurrera eramaten den bitartean, urtero ospatzen den artisau azoka izango dugu plazan, bertan produktuak eskuz nola egiten dituzten zuzenean ikusteaz gain, hauek erosteko aukera ere zabaltzen dutelarik.
Arratsaldean berriz, herri kirolak izango ditugu auzoko pilotalekuan eta nola ez, egun guztian zehar Itzeder eta Ioseba trikitilariek alaituko dituzte kaleak beraien musikaz.
Azkenik, eta festak behar bezala amaitzeko, aurten ere ez da faltako Matxinbentako produktuekin osatutako otarraren zozketa. Parte hartu eta jai ederrak pasa!
