Igande goizez herrian ospatu zen mendi bizikleta trabesiari aurretik jarri zioten izena ezin hobeto etorri zaio aurtengoan. Irisasi BTT 2012 'Hotzak akabatzen' trabesia zuen izena eta igandekoa hotzak akabatzeko modukoa izan zen Andatza Mendizale Elkartearen barruan sortu den BTT taldeak antolatutako proba.
Hala ere, 250 mendi bizikleta zale inguru izan ziren Usurbilen antolatutako lehen proba honetan parte hartu zutenak. Goizean goizetik, eta eguraldi makurra izan arren, izena ematera gerturatu ziren herri desberdinetatik etorritako BTT zaleak eta goizeko 9:00etan irteera ematerako frontoia txirrindulariz betea zegoen. Hortik aurrera, gozamena batzuentzat, sufrimendua besteentzat. Irteera neutralizatua izan zuten Txokoaldera arte eta hortik aurrera Irisasiko bidezidor desberdinetatik pasa behar izan zuten. Andatzako parajeak, gainera, ukitu bereziarekin aurkitu zituzten. Elurraren zuritasuna izan zuten bidelagun, zuri-zuri topatu baitzuten Andatza. Azken finean, hainbat eta hainbat parte-hartzailek aipatu moduan, denetik izan zuten atzoko proban: euria, elurra eta azken orduan eguzkia ere bai.
Azkenean, herriko pilotalekuan izan zen trabesia honen amaiera. 30 kilometroko inguruko ibilbidea egin ostean bertara gerturatzen joan ziren pixkanaka-pixkanaka partaideak. Banaka, binaka, hirunaka... ahal zuten moduan iristen joan ziren. Bertan, barruak berotzeko zain zituzten salda beroa, eta pintxo desberdinak, baita edatekoa ere. Horrez gain, opari desberdinak zozketatu zituzten partaide guztien artean.
