Ekitaldi ezberdina izango da gaur iluntzean Maizpide Euskaltegiko zinema aretoan. Solasaldi, bertso-saio, antzezalan edota film emanaldiak hartu izan ohi dituen areto hau gaurkoan nolabaiteko pasarela bihurtuko da, Haizea Arranz diseinatzailearen lanak ikusteko aukera eskainiko duen moda-erakustaldi bat izango baita bertan.
Euskal Herrian moda alternatiboaren barruan bere lekutxoa egin du Zumarragako diseinatzaile gazte honek. Jantzi eta osagarriak diseinatzen ditu. Hori bai, beti edizio mugatuak eta pieza bakarrak sortzen ditu, «banakotasunaren ideiari eusteko». Izan ere, bere ustez, sentimenduak, sentsazioak eta esperientziak adierazteko modu bat da moda.
Kortsea, ezinbesteko
Pasa den urrian Donostian egin zen Kutxa Kultur Moda diseina-tzaile gazteen erakustaldian parte hartu zuen Arranzek bere diseinuak erakusten. Horietan leku berezia izan zuen kortseak. Izan ere, bere azken apustuetako bat da hori. Gorputzera ongi egokitzen den jantzia dela deritzo, ongi ematen duena eta, gainera, nolabait argaldu edo estilizatu egiten duena. Edozein estilotara egokitzen omen da kortsea, «bakeroekin ere jantzi daiteke».
Gaur Maizpiden egingo duen erakustaldian ziurrenik ere izango da tarterik pieza honentzat. 21:00etan izango da hitzordua eta sei neska arituko dira modelo lanetan. «Jendea anima dadila, mereziko du-eta!», luzatzen dute gonbidapena Maizpidetik.
