Urtero bezala, asteartean musikarien zaintzaria den Xixili Donearen eguna ospatzeko jaia antolatu du Getariako J. S. Elkano Musika eskolak ere, arratsaldeko 17:30etik aurrera hasiko dituen ekitaldiekin: kalejira, emanalditxoa eta txokolatada.
Kalejirak emango dio hasiera ospakizunari, 17:30ean plazatik abiatuz musika eskolako ikasle guztiekin, trikitilari, panderojole, txistulari eta dantzariek lagunduta, ohitura legez alde zaharreko kaleetan barrena, kale Nagusitik Artzaperaino eta bueltan Elkano kaletik plazara, txoko guztiak musikaz jantziz.
Kalejiraren ostean, abesbatza, trikitilari, txistulari eta dantzako 1. eta 2. mailako ikasleen parte-har-tzearekin emanaldia izango da frontoian, eta amaieran , urtero bezala, txokolatada plazan gerturatzen diren guztientzat.
Bestalde, Xixili Donearen ospakizuna dela eta, asteartean lehenago amaituko dira musika eskolako klaseak, arratsaldeko 17:15ak arte soilik izanik bertan eskolak.
Musika Banda ere kalejiran
Musika Eskolakoak bezala, Aitor Uriak zuzentzen duen Getariako Musika Banda ere kalejiran izango dugu astearte honetan, Xixili Donearen eguna dela eta, arratsaldeko 19:30etatik aurrera.
