Ardiki Kutur Elkarteak antolaturik, atzo egin zen, Zaldibian, XVII. Ardiki Eguna. Jende ugari bildu zen, eta giro ederrean bete zen programan iragarririk zegoen guztia. Era bateko eta besteko sailtzaile ibiltari asko inguratu zen Ardiki Egunaren aitzakian.
Mondeju-lehiaketa, gazta-txapelketa eta mondeju-muturrak dastatzea izan ziren plazako ekin- tza nagusiak. Hirurek lortu zuten arrakasta bikaina. Adituen esanetan, kalitate handiko mondeju eta gaztak azaldu ziren plazara, eta mondeju-pintxoak gozotan jan zituen jendeak, azkeneko muturreraino. Ez zen falta izan bestelako ikuskizunik.
Zaldibian bizi den Amezketako Maria Luisa Moreak irabazi zuen mondeju-lehiaketa. Ezin esan kasualitatea denik, aurtengoarekin seigarren garaipena baitu. Azkeneko 10 edizioetan, 9 aldiz igo da 'podium'-era. Ondoren, Lazkaoko Kaietana Etxeberria izan zen; honek ere sari asko lortu izan ditu; hirugarren postua, berriz, Zaldibian bizi den Lazkaomendiko Mari Jose Alkaiagak eskuratu zuen.
Aralarko gazta
Aralarko Gazta Lehiaketari dagokionez, Altzoko Migel Amianok lortu zuen lehenengo postua; Elordin gobernatzen du artaldea. Ordiziako Joseba Insaustik bigarren postua lortu zuen; Mendibilen larreratzen du artaldea. Hirugarren postuan, berriz, Errezilgo Juan Mari Zinkunegi 'Aitzarte E. Z.' izan zen; hau Doniturrieta Garakoan dagoena.
Herriko tabernetan egiten den bazkarian ere jende asko bildu zen, ardikiaz osaturiko menua dasta- tzen: mondejua, ardikia saltsan, ardikia erreta piperrekin eta postrean gazta. Horixe da benetako Ardiki Eguna! Krisia krisi, aurten ere jatetxe eta elkarte guztiak bete dira, guztira, 300 bat pertsona izango ziren.
Gainontzeko ekintzek ere ikusmira handia sortu zuten; esate baterako, Artesautza Erakusketak. Denetik ikusi ahal izan zen: mondejuak egiten, artilea lantzen, galtzerdiak eta saskiak egiten, eta abar. Ganadu-erakusketa ere ain- tzat hartzeko modukoa izan zen.
Musika aldetik ere ongi hornitu zuten atzo Zaldibia. Horko txistulari, dultzainari, albokari eta abarren soinuen oihartzunak entzun daitezke oraindik kaleko horma zaharretan.
