Idiazabalgo taldeari 2-3 irabaziz hasi du 2011-12 denboraldia Aralar Intxurreko infantil mutilen taldeak. Jokoan ziren lehenengo hiru puntuak poltsikoratuta, beraz, sailkapeneko hirugarren postuan dira alegiarrak, lehenengo bietan dauden Tolosa eta Lazkaorekin puntutara berdinduta. Datorren asteburuan apur liteke berdinketa hori, tolosarrak izango baitituzte aurkari Elorri futbol zelaian jokatuko den neurketan.
Beste behin ere aipamen berezia merezi du kadeteen mailan diharduen nesken taldeak, 10-1eko emaitzarekin hartu baitzuten mendean Andoaingo Euskalduna. Laugarren partida jarraian irabazi ostean, sailkapeneko bigarren postuan dira alegiarrak hamabi punturekin, lidergoan den Tolosarekin puntutara berdinduta. Datorren astean hirugarrenean den Ordiziaren aurka jokatuko dute etxean.
Jubenil mutilen taldeak ere andoaindarrak izan ditu arerio pasa den jardunaldian, eta hauek ere hiru puntuak eskuratu ahal izan dituzte: 4-1 irabazi zioten Euskalduna Bri. Gauzak horrela, laugarren postuan dira sei punturekin, aurretik duten Segura Goierrirekin eta atzetik duten Urola Brekin puntutara berdinduta. Azken hau izango dute arerio datorren asteburuan.
Preferentean diharduen Intxurreko taldeak 5-2 galdu zuen Eibartarraren aurkako neurketa. Ondorioz, hamabosgarren postuan dira bost punturekin, atzetik zuten Eibarko taldeak aurrea hartu baitie. Datorren asteburuan Getariako Ketaren aurka jokatuko dute; getariarrak bosgarren postuan daude hamaika punturekin. Eta amaitzeko, kadete mutilen taldeak ere ezin izan du punturik eskuratu pasa den jardunaldian. 2-1 galdu zuen Tolosa Bren aurka eta, ondorioz, punturik gabe jarraitzen dute. Ea datorren asteburuan Beasain Bren aurka denboraldiko lehenengo puntuak eskuratzeko moduan diren.
