Futbola izango da jorratuko den gain nagusia bihar Oiartzun Irratiko Kirolez Blai saioan eta ez nolanahiko gonbidatuekin. Oiartzunen dagoen maila altuenengo taldea batetik eta Gipuzkoako erreferentzia bestetik ondo ordezkatuak egongo dira Joxe Migel Lopezek zuzentzen duen saioan, beti bezela 13:15ean zuzenean eta 20:30etan errepikatuta.
Biharkoan Errealeko jokalari ospetsuenetakoak izango dira Oiar-tzungo Irratian. Egun joko zuzendari lanak hobeto burutzen dituzten Asier Illarramendik eta David Zurutuzak tarte bat egingo dute euren agendan Oiartzungo entzuleen artean euren gogoetak egiteko.
Bestalde, Oiartzun Kirol Elkarteko ohorezko erregional taldeko Beñat Apaolaza eta Unai Arbelaitz ere irratsaioan izango dira herriko talde gorenaren bilakaera azaltzeko. Betiko moduan, seriotasuna eta humorea uztartuko dira solasaldiaren zehar eta futbolzaleek ikasteko parada bikaina izango dute biharkoan.
Lau gonbidatuak asteburuko analisia egingo dute eta aurrera begira aurtengo helburu nagusien berri emango dute. Lauak ere amorru puntuarekin hitz egitea espero da, bai Errealak eta bai Oiartzunek etxetik kanpo galdu egin baitute azken jardunaldian. Donostiarrek Zaragozan 2-0 galdu zuten itxura eskasa emanda. Oiartzuarrek aldiz, hiru partida jarraian irabazi ondoren ezin izan zuten bolada onari jarraipena eman eta Mondragonen aurka 2-1 galdu zuten.
Hurrengo asterako animoak ere eskatuko dizkiete oiartzuarrei. Herritarrak Trintxerperen aurka jokatuko dute Ugaldetxon eta Errealak Getaferen kontra Anoetan.
