Usurbil Kirol Elkarteko 2. Nazional mailako mutilen taldeak gaur jokatuko du ligako lehen neurketa. Bergarako Labegaraieta kiroldegian jokatuko dute 18.15etan hasita Soraluze taldearen aurka.
Pasa den urtean bezala Euskadiko Txapelketan izango da aurten ere herriko senior mailako eskubaloi taldea. Iaz azken postuetan amaitu ostean maila galdu zuten, baina goiko mailetako talde batzuen arazoei esker maila mantentzea lortu du Atez Ate Usurbilek eta aurten ere maila oneko eskubaloia ikusteko aukera izango da Oiardo kiroldegian.
Hauxe izango da asteburu honetan liga txapelketa hasiko duen talde bakarra. Besteek datozen asteetan hasiko dira lehian. Denboraldi honetan emakumezkoen taldeak maila berri batean jokatuko du Euskadi mailan. Izan ere Preferente mailatik 2. Nazional mailara igotzea lortu zuten pasa den denboraldian. Emakumezkoen beste bi taldeek, kadete eta jubenilek, Euskadiko txapelketa jokatzen jarraituko dute eta mutilei dagokionez, aurtengoan jubenil mailako taldea izango da, nahiz eta kadete mailakoa osatzea ez duten lortu.
