Mutrikuko Udalaren udako egitarauaren barnean aurkezten zen 'Azpeitiko sokamutura. Soka ez da eten' dokumentalaren proiekzioa. Udako gau baterako plan ezin hobea zen Azpeitiko Sokamuturraren historiaren nondik norakoaz janztea. Horrelako zerbait pentsatuko zuten Mutrikuko kultur etxeko aretora gerturatu ziren ehun lagunak. Aretoa gainezka zegoen gaueko hamaiketan Enekoitz Esnaolak, dokumentalaren egileak, hitzaurrea egin zuenean. Minutu labur batzuk besterik ez zituen behar izan dokumentalaren zuzendariak bere obra aurkezteko. Gainera, ikusleak irrikan ziren bideoa ikusteko. Zezen Beltzekoak izan ziren emanaldiaren arduradunak. Ekitaldia amaitu ostean jendearen aurpegiak ikusita eta esanak entzunda, gustura gelditu zirela esan daiteke.
Gogoratu behar da Mutrikun sokamuturrarekiko tradizio handia badutela eta dokumentalean bertan azaltzen diren hiru ganadutegi - Albizu, Arno eta Gorixo - Mutrikukoak direla. Ganadutegi horiek Azpeitiko jaietan sokamuturreko zezenak ekartzen dituzte.
Sokamuturraren inguruko dokumental hau otsailean estreinatu zen Sanagustin kulturgunean inauteri garaian, orduan ere izaten baita sokamuturra Azpeitian. Ikus-entzunezko honen mila DVD ale atera zituen Azpeitiko elkarteak eta Juantxo Txiki tabernan daude eskuragarri 10 eurotan.
