Uzarragako San Joan eliza eta eraikina itxita geratu ziren herenegun, egubakoitzean, San Joan egunez hain zuzen ere, emandako meza nagusiaren ondoren. Aurretik jarrita zeuzkaten hesiak udal langileek, plazan zein elizperako bidean. Egun horretarako bazterrera kendu zituzten, baina atzera bere lekuan daude, eraikinerako sarrera oztopatuz.
Eraikinak jausteko arriskua du eta istripuren bat gerta ez dadin hartu ditu neurriok apezpikutzak, nahiz eta Uzarraga auzoan nolabaiteko haserrea sortu erabakiak, zenbait iturrik dioenez. Ez hori bakarrik. Laster itxitura formalagoa eta sendoagoa jartzekotan da gotzaintza. Kanposanturako sarrera zabalik lagatzeko asmoa dute, baita, jendeak bisitak egin ditzan.
Juan Kruz Mendizabal pastoraltzako arduraduna etorri zen egubakoitzeko meza nagusira. Berak esandakoaren arabera, eliza barruan dauden artelanekin zer egin erabaki behar dute. Batzuk Donostiako museora eramango dituzte. Berritzekotan ere badira, erretaula esate batera. Baliteke beste artelanen bat kaleko Errukizko Amaren elizara eroatea ere.
Ondarre eta Kalebarren
Ondarren eta Kalebarrenen aurrera darraite auzo festekin. Gaur goizean, eguerdi aldera, prozesioa helduko da Ondarrera. Haren ostean dantzariek saioa egingo dute, auzokoek eskainitako salda eta txorizoa hartu aurretik.
Arratsaldean, berriz, Kalebarrengo jaien txanda izango da. Umeentzako jolasak dituzte eta 'Malas compañías' taldeak kale antzerki ekitaldia emango du. Oilaskotxea, azkenik, zazpietan da.
