Udako Euskal Unibertsitateak martxan jarri ditu bere 39. Udako Ikastaroak. Markeskua Jauregia izango da hauen egoitza nagusia, hilaren 27tik aurrera. Guztira 35 ikastaro egongo dira Baiona, Iruña eta Eibarren, eta denen artean Markeskuakoak izango dira ugarienak, 16 kurtsorekin. UEUko zuzendaria den Karmele Artetxek eta Udako Ikastaroetako arduradunak Irati Iciar-ek, eskaintza zabal hau aurkeztu zuten atzo.
Aurtengo leloa 'Udako Ikastaroak murgildu' da. Abiapuntu horretatik Artetxek murgiltzera animatu zuen, «parte hartzen dutenek ikastaroan murgiltzea nahi dugu, ahalik eta etekin gehien atera diezaioten ezagutza berri horri, baina UEUko udako ikastaroetan sortzen den giro berezian ere murgiltzeko gonbidapena luzatzen diegu, hortik ere ekarpen berezia jasoko dutela ziur baikaude».
Bizi dugun krisiak bere eraginak izan ditu ikastaroetan. Aurten saio osagarririk ez da egongo (beste urtetan bertso saioak izan dira Eibarren). Baina Irati Iciar-ek argi utzi zuenez, «ikastaroen eduki eta adituen kalitatea daukagu. Horretan ez dugu merkealdirik onartzen». Gainera talde txikiak mantenduko dira. Ikastaroak antolatzeko orduan, hainbat pertsonak eta taldek hartu dute parte. Kolaboratzaileen artean, UEUko arduradunek Eibarko Tekniker zentro teknologikoa eta Badihardugu euskara elkartea aipatu zituzten.
Ia 200 persona Markeskuan
Eibarren eta beste egoitzetan antolatu diren ikastaroetako informazio guztia www.ueu.org webgunean edo Markeskuan bertan aurkitu daiteke. Matrikula epea hilaren 19an itxiko da orokorrean, baina badago aukera izena emateko ikastaro bakoitza hasi baina aste lehenago arte. Eibarko Udalak dirulaguntzak antolatu ditu aurten ere. Joan den urtean ia 200 pertsona aritu ziren Markeskuako ikastaroetan «eta aurten berdina espero dugu».
