Bihar, arratsaldeko 14:30etatik 19:30etara, aurtengo Euskadiko Trialsin txapelketararen hirugarren proba izango da Oiartzungo Arditurriko inguruetan. Euskaltrial txirrindulari klubak antolatu du, Oiartzungo Udalaren babes eta laguntzarekin.
Aiako Harriaren magaleko errekaren ondoan dauden bazterrez baliatuz, Euskadiko nahiz kanpotik etorritako txirrindulariak parte hartuko dute dagoeneko ospetsu bihurtu den proba honetan.
Txirrinda gainean, oinak lurrean jarri gabe, oreka ondo mantenduz, bost bihurgune pasa beharko dituzte txirrindulariek. Maila bakoitzeko bihurguneak desberdinak dira: gazteek bihurgune errazagoak izango dituzte eta eliteko txirrindulariek bihurgune zailagoak. Benetan harrigarrizko bihurguneak igaro behar izaten dituzte elite mailakoek.
Parte hartzaileen artean eskualdeko hainbat gazte izateaz gain, Euskal Herritik etorriko diren pertsona ospetsuak ere izango dira, adibidez, munduko txapelduna den Benito Ros, Abarzuzakoa.
Joan den urtean bezela, igandetik larunbatera pasa da proba, partaide eta ikusle gehiago erakartzeko asmoarekin. Kotxeak aparkatzeko nahikoa toki badago: Arditurriko meategietako aparkalekuan aparkatzea gomendatzen dute antolatzaileek.
