Uztarria Komunikazio Taldeak atzo aurkeztu zuen herriko hainbat pertsonaia ezagunen inguruko liburuxka biografikoetatik seigarrena. Alex Silva kazetariak eta DV-ko kolaboratzailea denak idatzi du liburuxka biografikoa.
Aurten beste bi lan argitaratuko ditu Uztarriak. "Herriko kazetari gazteei idazteko aukera ematea eta hainbat azpeitiarren biografiak argitaratzea" dira Uztarriak proiektu honetan uztartu nahi dituen helburuak.
Enkarna Arregi Iturbide baserrian jaiotakoa da, 25 urterekin moja sartu zen. Espainian hainbat tokitan ibili ondoren, Azpeitira bueltatu zen lanera, Ikastolara. Orduan bitxia zen moja bat (abituarekin janzten zen) ikastola batean lanean ikustea. Ikastolak erakutsitakoarekin eta gizarte aldaketen zurrunbiloak harrapatuta, moja bizimodua laga eta sekular bizitzari eustea erabaki zuen. Bizi berri bat zen beretzako, baina komentuan bizi zuen kontraesanetik at!
Liburuxka herriko liburudendetan eta Uztarriaren egoitzan (Perez Arregi, 1 behea) salgai izango da datorren astetik aurrera, 5 euroren truke.
