Berariazko legerik eta legezko onarpenik gabe jarraituko dute Frantzian hizkuntza gutxituek, euskara barne, herenegun ez baitzuen aurrera egin Pariseko Asanblea Nazionalean 'eskualdeetako hizkuntzak' aintzat hartuko zituen lege proiektuak. Hain zuzen ere, Armand Jung parlamentari sozialistak eraman zuen gaia parlamentura galdera baten bitartez. Ez zihoan bere izenean, Asanblea Nazionalean bertan frantsesa ez beste hizkuntzen inguruko lantaldearenean baizik, 59 parlamentarik sinatutako lege proposamena defendatuz.
Eta, gaia parlamentura iritsi den gainerako guztietan bezala, ezezko biribilarekin egin zuen topo. Nahiz eta 2008. urteaz geroztik Frantziako Konstituzioak aipatu hizkuntza gutxitu guztiak direla «Frantziaren ondare», horrek ez du lege aldetiko batere aldaketarik ekarri, eta frantsesak jarraitzen du Errepublikaren hizkuntza bakarra izaten. Horixe izan zen hauin zuzen Luc Chatel, Hezkuntza Nazionaleko ministroak, bere ezezkoa oinarritzeko erabili zuen argudio nagusia.
