Etxaniz autoeskolak eskainita gidabaimena euskaraz atera duten 22 lagunek diploma bana jaso zuten asteazkenean, abenduak 29, Udaletxeko Pleno Aretoan egindako ekitaldian.
Diplomak Udaleko Euskara zinegotzi den Yolanda Larrañagak eta Etxaniz autoeskolako Uxua Aizpuruk banatu zituzten.
Etxaniz autoeskolak maiatzetik du gidabaimena euskaraz ateratzeko eskaintza eta hainbat baliabide eta bitarteko jarri behar izan ditu, araudia euskaraz ikasteko ordenagailu bidezko aplikazioa adibidez. Egindako inbertsio horiek diruz lagundu ditu Udaleko Euskara Zerbitzuak. Yolanda Larrañaga zinegotziak adierazi zuenez: «Euskara eguneroko esparru denetara zabaltzen ari da, eta gidabaimenarena bat gehiago da. Honela, beste udalerritan egin bezala gurean ere dagoeneko bada gidabaimena euskaraz ateratzeko eskaintza aukera». Autoeskola eta Udaleko Euskara Zerbitzuak elkarlanean burututako ekimenarekin «oso gustura» dira. Udaberritik hona guztira 22 lagunek atera dute gidabaimena euskaraz, eta orain, lagun horiek diploma bana jaso dute. Diplomarekin azkoitiar horiek euskararen alde egindako aukeraketa txalotu nahi izan da, eta bide batez gidabaimena ateratzeko asmoa dutenei euskararen aldeko apustua egitera bultzatu. Aipatu, Etxaniz autoeskolakoek 'Euskararn Bidean' maila eskuratu zuela joan den apirilean.
