Lehen Hitzetik Zerbitzua Euskaraz» egitasmoa bideratzen aritu dira hainbat lagun Tolosan. Batetik merkatarien artean inkesta egin da euskararen inguruko datuak jakiteko, eta bestetik, euskararen erabileraren neurketa zuzena egin da hainbat dendatan, horretan Tolosako ikasleak aritu direlarik.
Euskararen erabileraren behaketaz hiru ikastetxeetako ikasleak arduratu dira. 75 denda aztertu dituzte, eta horietan eman diren 200 elkarrizketa. Behatutako elkarrizketa horietatik, 94 (%47) izan dira euskaraz, 48 (%24) gazteleraz eta 58 (%29) elebitan.
Azken finean, lortu nahi dena ekintza honetan da merkataritza arloan euskararen erabilera nolakoa den jakitea, dauden hutsuneak aztertu eta horiek betetzeko hartu beharreko neurriak finkatu.
Aste honetatik aurrera, «Lehen Hitzetik Zerbitzua Euskaraz» kartelak jarri dira Tolosako dendetan (kartelak, irgarkiak,, pinak...). Iragarki hauen bitartez dendariak eta bezeroak gonbidatu nahi da, euskara hizkuntza salerosketetan guztiok erabili dezagun.
Tolosa & Co merkatari elkartekoen ustez, «Tolosan euskaraz erosteko aukera dago, euskararen aldeko apustua egiten dugu». Udalak, bere aldetik, dendariek «zer esan handia» dela euskararen erabileran uste du.
«Aurrera begira ere, bide honetatik jarraituko dugu, eragileekin elkarlanean, gisa honetakoa bezalako kanpainak bultzatzen».
