Burdinola eta Badihardugu elkarteak proiektu berri bat ezagutzera eman dute Legazpin, bi helburu nagusi dituena: herriak duen euskara ondarea jasotzea eta gure aurrekoen bizimodua nolakoa izan zen ezagutaraztea. Horretarako bi baliabide erabili dituzte. Lehenengoa eta garrantzitsuena, adineko legazpiarrak izan dira. Guztira 32 bizilagun elkarrizketatu dituzte proiektu honen barruan, bakoitzaren adierazpenak bideo kamararekin grabatuz. Bigarren baliabidea Internet dugu, bildutako material guztia honen bidez zabalduko dute eta: «Elkarrizketa guztiak antolatu, landu eta digitalizatu ondoren, sarean zintzilikatuko asmoa dugu, herritar guztien eskura egon daitezen», azaldu du Aitziber Otegi, Badihardugu elkarteko partaidea. Honek eta Burdinolako lehendakaria den Jose Luis Ugartek ekimena aurkeztu zuten ostiralean kultur etxean, elkarrizketetan parte hartu duten herritar ugariz inguraturik. Proiektuari 'Legazpiko ahotsak' izena eman diote eta dagoeneko, bere lehen emaitzak ezagutu daitezke www. ahotsak. com web gunera sartuz.
Auzo desberdinetako jendea
Badihardugu elkarteak urteak daramatza herri desberdinetako ahozko ondarea eta herri hizkerak biltzen, adineko jendea elkarrizketatuz eta euren euskara eta bizipenak jasoz. «Lan txalogarria egiten ari dira eta beraien azpiegitura eta jakintza erabiltzea garrantzitsua zela pentsatu genuen Burdinolan, horrela, beraiekin harremanetan jarri ginen eta baiezkoa jaso ondoren, lanak banatu genituen», aditzera eman zuen Jose Luis Ugartek. «Gure eginkizuna adineko herritar euskaldunak topatzea izan da, Brinkola, Telleriarte, Aztiri, Hegialde, Elbarrena eta kaleko ordezkariak lortuz», azaldu zuen Burdinolako lehendakariak. «Ondoren, Aitziber Otegi, Badihardugu elkarteko kidea, elkarrizketak egiteaz arduratu da eta badakigu oso ondo moldatu dela», zioen. Aitziberrek bere aldetik, etxe desberdinetan jasotako harrera bikaina eskertu zuen. Guztira 32 elkarrizketa egin ditu eta hauekin batera, jadanik herrian zeuden beste zenbait grabazio zahar bildu ditu. Datozen hilabeteetan jasotako materiala lantzen eta aztertzen hasiko da Badihardugu elkartea, etorkizunean sarean zintzilikatzeko asmoz. Bi elkarteek Udalari eskerrak eman zizkioten proiektua aurrera eramateko emandako laguntzagatik eta aditzera eman zutenez, «aurten egindako lana proiektuaren lehen atala baino ez izatea espero dute».
