Asteartean, urriak 26, arratsaldeko 18:30ean hasita, Euskara Planak enpresetan txertatzeko eta beren esperientzia erakusteko Antzuolako Elay enpresakoak izango dira Azpeitiko Euskara Patronatuan. Elegunen diharduten enpresez gain, sindikatuak ere gonbidatu dituzte, baina saioa irekia izango denez, interesa duen oro ager daiteke bertara.
Hizkuntza politika enpresa munduan, horixe izan zen iaz Elegunetik landutako gaia. Kasu praktiko gisa, iaz Copreci Kooperatiba gonbidatu zuten beraien ibilbidea ezagutzeko.
Aurten ere, iazkoari jarraituz, Elayko ordezkariak gonbidatu dituzte beraien esperientzia ezagutu ahal izateko. Gaur egun Elay Taldea Antzuolako Elay SLk, Elay Industrial SAk eta Mexikoko Celay SA de CVk osatzen dute.
Elay proiektu pilotua izan zen Euskara Planak enpresetan txertatzerakoan. Euskara plana txertatu aurretik, 1982an egindako aurrelanetatik hasi eta euskara sistematizatzeraino, hots, euskara erakundetzera arteko ibilbidean emandako urratsen berri eta lortutako emaitzak ezagutzeko aukera izango da Euskara Patronatuko saioan.
