Pasa den Santiyutan Iturriotz auzoko Dorretxea inauguratu zuen Aitor Etxeberria alkateak. Nola ez, inaugurazio berezia izan zen, udalak herritarrekin eta datorren ikasturtetik aurrera eraikina erabiliko duten elkarteetako kideekin egin nahi izan zuena.
Kuadrillategi egitasmoko gaztetxoen kalejira, Udal Bertso Eskolako bertsolarien kantuak eta Helduen tailerretako yogako ikasleen saioarekin inauguratua gelditu zen Dorretxea, Santiyutako jai egitarauaren baitan.
Datorren irailetik aurrera, herriko hainbat elkartek erabiliko dute tokia euren ekintzak aurrera eramateko.
'Aski prexko' udal aldizkaria
Abuztuan, udako oporrak direla eta, ez da argitaratuko 'Aski prexko' udal aldizkaria. Berriz ere irailetik aurrera posta elektronikoz (komunikazio@oiartzun.org helbidean bidaltzeko eskaera egin daiteke) eta ohiko tokietan jaso ahal izango da hamabostekaria: zerbitzu publikoetan, tabernetan, elkarteetan eta auzoetako dendetan.
Orduan ere ohiko atalekin itzuliko da 'Aski Prexko': udal albisteak, iritziak, elkarrizketak, herriko berriak iruditan, atez ateko bilketaren inguruko informazio praktikoa, telefonoak, eta abar.
Patzuergoaren egoitza
Udal Ikastola Patzuergoaren egoitza izango dena eraikitzen hasi berri da udala. 2011ko irailerako erabiltzeko moduan egongo dela aurrekusi du udalak.
Orain, eraikuntza egongo den eremua prestatzeko lanak hasi dira. Besteak beste, saneamenduko hodien ibilbidea aldatuko da eta uraren, argiaren eta telekomunikazioen azpiegiturak pasatuko dira. Irailean, berriz, eraikuntza bera egiteko lanak hasiko dira.
Udal Ikastola Patzuergoak 174 haurri ematen dio zerbitzua eta gaur egun nahiko egoera desegokian dago: bost toki ezberdinetan banatuta dago Patzuergoa eta horrek zailtasun eta deserosotasun ugari sortzen ditu antolamenduari dagokionez.
