Zarauzko Udaleko Euskara Sailak herriko merkataritzan euskara bultzatu nahi du. Herriko dendetako hizkuntza paisaia eta ohiturak aldatzeko ahaleginaren barruan, lehen urratsa izan da 'Eska ezazu euskaraz!' kanpaina.
Okindegi, arrandegi, harategi eta fruta-dendetan jarri da martxan, Aia, Getaria eta Zumaiako Udalekin eta Urola Kostako Udal Elkartearekin batera.
Herriko 60 denda baino gehiago bisitatu dituzte: 32 okindegi, 13 fruta-denda, 13 harategi eta 9 arrandegi. Eta inprimategian egindako kartelak banatu zaizkie, ikusgai jartzeko. Karteletan, ogien, fruta eta barazkien, haragien edo arrainen izenak eta argazkiak datoz, kontsumitzaileak erosketak euskaraz egitera bultzatzeko.
Izan ere, askotan kontsumitzaileok ez dugu jakiten nola esan produktu baten izena euskaraz, eta kartel horien bidez, produktu bakoitza euskarazko izen batekin lotuko dugu argazkiei esker. Kartelekin batera, Euskara Sailak sektore bakoitzarentzat apropos diseinatutako hiztegiak ere banatu ditu.
Egindako bisitetan Euskara Sailaren eskaintzaren berri eman zaie merkatariei: errotuluak eta irudi korporatiboko elementuak euskalduntzeko diru-laguntzak; itzulpenak eta hizkuntza aholkularitza (kontsultak); kartelak, norberak esandako testuarekin eta tamainan, eta Dendaketan ikastaroa.
Itzulpenak, kartelak eta Dendaketan ikastaroa doan eskaintzen dizkie Udalak merkatariei. Informazio gehiago nahi duenak 943.005116 telefonora deitu dezake, Euskara Zebitzura agertu (Balea kalea 2, behea), edo euskaraz@zarautz.org helbidera idatzi.
