Natura, kultura eta gastronomia uztartuz, Larraulen turismoari bultzada bat eman nahian, Ekomuseoa sortu dute. Dina 7 taldeak sortutako proiektua da, Larraulgo Udala, Tolosaldea Garatzen, Tolomendi eta Tolosaldea tour-ek lagundurik. Proiektu berri honetan, herriko baliabideei etekin bat atera nahian buru belarri aritu dira herriko historia, lanbideak, bizimodua eta beste hainbat gairen inguruan datuak biltzen. Orain, museo etnografikoan eta San Esteban elizan bilduta daude eta herriko, bailarako eta urrutitik etortzen diren lagunei ezagutzera eman nahi diete Dina 7 taldea osatzen duten Iñaki Alcalde, Karlos Irazu, Jexus Mari Irazu, Koldo Jauregi, Aitziber Mendiola, Olga Villa eta Pili Otaegik.
Atzo, Larraulgo plazan egindako agerraldian, kultur taldeko kideez gain, Xabier Mujika alkatea, Tolosaldea Garatzeneko Jose Luis Urdangarin, Tolosadea tour-eko Olatz Illarregi eta Tolomendiko Iker Karrera eta Imanol Olano izan ziren. Dina 7 taldekoek esan zutenez, «bistan zegoen museo etnografikoari berrikuntza bat eman behar zitzaiola eta hau aprobetxatuz, herrian dauden baliabide ba-tzuk bultzatu nahi izan ditugu turismo suspertu nahian. Karobiak, errota, herri bideak, baserriak, hauen inguruan kultura eta historia jasota dago eta guk ezagutzera eman nahi dugu». Horrela sortu da Larraulgo ekomuseoa.
Bihar, museoaren eguna
Horretarako bihar jaialdi bat antolatu dute. Goizean hasita, hainbat ekintza burutuko dira. Horien artean, orain hamar bat urte, elizaren zaharberritze lanak tarteko, XVI. mendeko 'grisalla', tenperan pintaturiko erretaula, ikustekoa aukera egongo da. Zuri-beltz eta grisean egindako pintura hau bakarra da Gipuzkoan Aitziber Mendiolak, Dina 7ko kideak, azaldu zuenez. «Estilo erromanikoko artista batek egina da, baina ez dakigu bere izena». Margolan honen balio historiko handia da eta gaur egun, ikusi daiteke erretaularen atzean. Bihar ikusi ahal izango dute larrauldarrek eta bertara hurbiltzen diren lagunek, eta Mendiolaren azalpenak entzunez honen historia ikasi. Elizako 'grisalla' Larraulgo altxorretako bat da, baina bihar museoan jasotako beste asko ikusi eta hauen erabilpena eta bestelako ezaugarriak ikasi ahal izango dira Koldo Jauregik eskainitako azalpenekin. Bestalde, egunean zehar, buztin, egur, ogi eta ukenduak egiteko tailerrak egongo dira eta giro paregabea.
