Uztarria Komunikazio Taldeak iazko martxoan abiatutako proiektuaren laugarren alea kaleratu berri du. Santi Lazkano txirrindulari errezildarraren biografia, alegia. Hainbat azpeitiarren inguruko liburuxka biografikoak kaleratzeko ekimenean Julian Bereziartua izan zen lehena. Ondoren, Leo Etxeberria eta Valentina Agirreren bizitzen inguruko lanak aurkeztu zituen.
Uztarriaren helburuetako bat herrian komunikazio munduko gazteei idazteko aukera ematea da. Nekane Zinkunegik jaso ditu Lazkanoren bizitzako gora-beherak. Kazetariaren lehen lana izan da hau eta «Santi Lazkano nor izan zen jakiteko balio izan dit», aitortu du egileak.
Santi Lazkano 1985eko otsailaren 3an hil zen moto istripuz. Txirrindulari aski ezaguna izan zen eta ibilbide oparoa egin zuen gainera. Berea izan zen Lagun Onak Txirrindulari elkartea sortzeko ideia.
Bost euro
Bazkideek dagoeneko etxean jaso dute Santi Lazkanoren biografia. Erosi nahi duenak, herriko liburu dendetan eta Uztarriaren egoitzan eskuratu ahal izango du bost euroren truke. Hurrengo lana Amaia Garmendiari eskainiko zaio eta Xabier Otamendik idatziko du. Guztira, hamabi-hamalau liburuxkek osatuko dute bilduma.
