Azpeitia, Zarautz, Zumaia, Aia, Aizarnazabal, Azkoitia, Beizama, Orio, Getaria eta Zestoako herriek -Bidegoian eta Errezil ere gehituko dira- euskararen normalizazioaren bidean aurrerapauso garrantzitsua eman zuten atzokoan. Alkateek Gipuzkoa Donostia Kutxa erakundearekin batera, euskara sustatzeko hitzarmena sinatu zuten. «Egun berezia da gaurkoa euskararen normalizazioaren bidean, urrats garrantzitsua ematen dugulako, aurrerapauso handi bat. Kasu honetan, azpimarratu behar dugu Kutxa bera izan dela proiektu hau bideratzeko ate joka etorri zaiguna eta eskertzekoa da ahalegina, izan ere, normalean, Udalak ibili ohi gara erakundeei ate joka», adierazi zuen Azpeitiko alkate Julian Eizmendik.
Kutxako Gizarte Arlo Komunikazio zuzendari Carlos Ruizek hi-tzarmen honekin hartutako «kon-promisoa» azpimarratu zuen. «Euskararen alde gaudela esan bakarrik ez, elkarlana eta jarraipena ere bultzatu behar dira». Beñat Etxepareren hitzak ekarri zituen gogora ordezkariak. «Euskara jalgi hadi plazara, zioen berak. Guk jalgi hadi lan mundura, administraziora..., gehitu nahi diogu».
Gipuzkoako Foru Aldundiko Euskararako zuzendari nagusi Estitxu Alkortak ere euskararen erabilera sendotzeko tresnak sortzearen garrantzia aipatu zuen eta lan hori, «Eusko Jaurlatzirarekin batera» egitearen garrantzia azpimarratu ere. «Azken bolada honetan nahiko laino beltzak ikusten baditugu ere», esan zuen, «nahiago nuke lainoak uxatuko balira».
Alkortak Azpeitiaren hizkuntza politika eta praktika nabarmendu zituen eta Azpeitia «euskararen-tzat arnas-gune» dela adierazi zuen.
Julian Eimendi izan zen hitzarmena sinatzen lehena eta, ondoren, gainerako alkateak banan-bana pasa ziren mahaitik.
