Ttur-ttur Euskaltzaleon Bilgunearen eta Oiartzungo Udalaren arteko hitzarmenari esker, martxan da Oiartzungo merkataritzan eta ostalaritzan euskararen erabilera areagotzeko egitasmoa. «Oraingoan, euren establezimenduetan zerbitzua euskaraz ematen laguntzeko eskura dituzten doako zerbitzu eta materialen berri emateko zuzendu gara merkatariengana», dio hitzarmenak. Beste behin ere, merkatariak eta ostalariak euren zerbitzua euskaraz ematera animatu nahi izan dituzte. Batetik, belaunaldi berriak euskaraz ongi prestatuak eta euskara eske datozelako eta bestetik, euskara establezimenduaren kalitate ezaugarri garrantzitsua delako, besteak beste, bezeroekiko errespetua erakusten duelako. Zerbitzua euskaraz eskaintzen laguntzeko, honako zerbitzuak dituzte eskura: Itzulpen eta Hizkuntza aholkularitza zerbitzua: Testuen zuzenketa eta itzulpena koloretako paper diseinatuetan maketaturik.
Informazio oharrak: Establezimenduaren atean jartzeko oharrak: 'Zabalik-Itxita', 'Oraintxe nator'. Txartelak: 'Merkealdia', 'Eskaintzak', 'Lehen/orain' (bi prezioak jartzeko).
Eranskailuak: 'Hemen euskaraz egin dezakezu', 'Jatetxe honetan menua euskaraz'. Talonarioak: fakturak, entrega agiriak, baleak eta ordainagiriak. Hiztegi sektorialak. Euskara eskolak: Merkatariei eta ostalariei zuzenduriko ikastaroak. Diru laguntzak: Establezimenduaren errotulua euskaraz jartzeko. Poltsak euskaraz jartzeko. Euskara eskoletarako.
Honela, merkatariek eta ostalariek beren establezimenduaren kalitatea dohainik hobetzeko aukera dute. Izan ere, zerbitzu honen laguntzaz establezimenduak kalitatea irabaziko du eta dohainik!
Jakinarazi digutenez, zerbitzu honen berri emateko gutuna bidali diete merkatariei eta ostalariei. Baina, baten batek zerbitzuaren eskaintza postaz jaso ez badu edo zerbitzuaren erabiltzaile izan nahi badu, arduraduneekin harremanetan jartzeko eman behar dituen pausoak ondorengoak dira: Aurrez aurre, Fermiñene etxea, Aialde kalea 2, 1.solairua. Telefonoz: 943260182. e-postaz: tturttur.oiartzun @gmail.com.
Amaitzeko, herritarrei, bezeroei, euren merkatari edo ostalariak zerbitzua euskaraz eskaintzeko hutsuneren bat duela iruditzen bazaio, zerbitzu honen berri eman eta zerbitzua erabiltzera bultzatzeko guztiei dei egiten diete.
