Diario Vasco

Tolosaldea IKT-ko benjamin eta alebinen erakustaldia Usabalen

Irudian, Tolosaldea IKT-ko igerilariak Usabal kiroldegian, orain dela bi aste egin zuten erakustaldiaren egunean.
Irudian, Tolosaldea IKT-ko igerilariak Usabal kiroldegian, orain dela bi aste egin zuten erakustaldiaren egunean. / IÑIGO ROYO

Tolosaldea IKT taldeak benjamin eta alebin mailetako igerilari gazteen erakustaldia antolatu zuen duela astebete Tolosako Usabal kiroldegian.

Jardunaldia luzatu egin bazen ere, taldeko entrenatzaile eta arduradunek diote aipagarriak direla ertan «bizitako giroa, gazteenen ilusioa, jarrera bikaina eta umore ona».

Guztira, Villabonako eta Tolosako igeriketa eskoletan aritzen diren eskola kiroleko hogeita hamasei benjaminek eta hogeita hamar alebinek hartu zuten parte. Maila eta adin bakoitzari egokituz, igerilari bakoitzak bere distantzia eta estiloko probari ekin zion, baita taldekako errelebo probari ere.

Lehenik eta behin, igel eta amuarrainez osatutako benjamin gazteen taldea «ederki lehiatu zen», eta bizkar estiloko proban eta seiko kroleko erreleboetan parte hartu zuten. Klubetik diote zenbaiten kasuan, lehen aldia zela horrelako proba batean parte hartzen, baina guztiek urduritasunak alde batera utzi, eta estilo txukunean egin zuten igeri, «hainbeste beldur eragiten duen biraketa zaila ederki ikasia dutela erakutsiz».

Benjamin handiak, berriz, bizkar eta bular estiloetan lehiatu ziren; bizkar estiloko probetan teknika oso landua dutela erakutsi zuten, baina benetako erakustaldia bular estiloa izan zen. Azken hilabeteetan, igeriketa-estiloa fintzeko egindako lana bikaina izan dela erakutsi zuten oro har, eta igerilariak oso dotoreak izan ziren proba gehienetan. Saioa amaitzeko, kroleko erreleboan parte hartu zuten, eta Gipuzkoako beste taldeen aurka lasterketa oso politak egin zituzten. «Eskualdeko izurde taldeak benetan izena ondo jarria duela erakutsi zuen, izurde txikiak bezala igeri egin baitzuten», diote Tolosaldea IKT-ko entrenatzaile eta arduradunek.

Arratsaldeko bigarren zatian, alebinen taldea osatzen duten izurde eta marrazoek parte hartu zuten. Hauek ere bizkar eta bular estiloetan lehiatu ziren, baina adinari dagokionez nagusiagoak direnez, proba luzeagoetan parte hartu zuten. Igeriketa taldetik gehitzen dute benetan kalitate handiko probak ikusi ahal izan zituztela, eta zortzi neska mutilez osatutako errelebo taldea «zoragarria» izan zela: «nabari da alebinen taldean igerilariak esperientzia eta konfiantza irabazten ari direla, larunbatean helduen mailan parte hartu baitzuten».

Txalotzekoa

«Igerilarien jarrera eta lana goraipatzekoak badira ere, ez da gutxiagorako arratsalde osoan lanean jardun zen guraso boluntario taldearena. Lan handia egin zuten hauek ere, esatari, kronometratzaile, muntatzaile... denetik behar izaten dugu gure txikiak horrelako saioetan parte hartu eta gozatzen ikusteko, eta hauek ere etxeko txikiek bezala ohorezko matrikularekin amaitu zuten saioa».

Recibe nuestras newsletters en tu email

Apúntate