Diario Vasco

Jabetza Eskola martxan da berriro

Maite Ruiz de Eguilaz eta Mertxe Fernandez, prentsaurrekoan.
Maite Ruiz de Eguilaz eta Mertxe Fernandez, prentsaurrekoan.
  • Martikulazio epea jadanik irekita dago eta lehen zita urriaren 5ean izango da 'Munduko emakumeen literatura: rive gauche-ko emakumeak' ikastaroarekin

Ikasturte berriarekin bat, Tolosako Jabetza Eskola martxan da berriro ere. Urritik abendura bitarteko egitaraua antolatu dute Tolosako berdintasun sailean eta lehen zita urriaren 5ean izango da 'Munduko emakumeen literatura: rive gauche-ko emakumeak' ikastaroarekin.

Aurreko denboraldiko datuak Jabetza Eskolaren erritmo eta onarpen ona azpimarratzen dutela adierazi du Maite Ruiz de Eguilaz, Tolosako Udaleko Berdintasun zinegotziak: «Apirila eta ekaina bitarteko eskolan burututako 8 jardueretan 120 matrikulazio egin ziren eta guztira, 108 emakumek parte hartu zuten».

Oraingoan 14 jarduera antolatu dira, eta tolosarrei zein interesa dutenei asebeteko diela esan du zinegotziak: «Espazio hau emakumeon partaidetza eta jabekuntza sendotzeko dago pentsatuta, eta gizarte justu, anitz eta osoago bat lortzeko, eta hain zuzen hori bultzatu nahi dugu ikastaro eta tailer sorta anitz honekin».

Maite Ruiz de Eguilazek eskolaren garrantzian eta eboluzioan sakondu du. Tolosako Udaleko Berdintasun teknikaria den Mertxe Fernandez ere bertan egon da.

Jabetza Eskolaren prestakuntza eskaintza emakumeei zuzenduta dago eta horien partehartzea areagotzeaz gainera, emakume taldeak indartu, eta horien arteko sareak eta akordioak sustatzea dutela helburu azpimarratu du Berdintasun zinegotziak.

Izen-emateak, Kultur Etxean

Ohi bezala, Kultur Etxean burutuko dira izen-emateak eta matrikulak gaurtik aurrera, ordutegi honetan: goizeko 10:00etatik 13:00etara eta arratsaldeko 16:00etatik 19:00etara.

Jakin ere, dohaineko haurtzaindegi-zerbitzua ere egongo dela, aurretik izena eman eta eskatuta.

Temas