Produktu fitosanitarioen aplikatzailearen oinarrizko txartela ateratzeko ikastaroa Abaltzisketan

GOIKOETXEA ABALTZISKETA.

Fraisorok Produktu Fitosanitarioen (nekazaritzan eta baratzeetan erabiltzen diren produktuak) Aplikatzailearen oinarrizko txartela ateratzeko ikastaroak antolatzen ditu. Abaltzisketan egiteko asmoa dute martxoan, baina 20 laguneko taldea osatzea ezinbestekoa da ikastaroa martxan jartzeko. Amezketarrei ere bertan parte hartzeko deialdia zabaldu diete.

Hogeita bost orduko ikastaroa izango da, normalean gaztelaniaz, nekazaritza-txartela dutenei edo produktu fitosanitarioekin lan egiten dutenei (lorezainak, fitosanitarioen saltzaileak, udaletxeetako brigadak...) zuzendua. Bi kasu horietako batean ez daudenek ezingo dute ikastaroan parte hartu.

Helburua oinarrizko txartela lortzea eta produktu fitosanitarioek duten arriskuaz jabetzea da. Ikastaroa gainditzeko bi baldintza bete behar dituzte parte-hartzaileek: %80ko asistentzia betetzea eta azterketa gainditzea.

Matrikulak 36 euroko kostua du eta interesatuek bi argazki eta NANaren fotokopia aurkeztu behar dituzte.

Ikastaro honetan parte hartu nahi dutenek otsailaren 28a baino lehen eman behar dute izena Abaltzisketako udaletxean (943652900). Udaletxea goizero irekita dago asteartetan izan ezik.

Contenido Patrocinado

Fotos

Vídeos